domingo, 17 de julho de 2016

ADONDE S’ANSINA LA LHÉNGUA MIRANDESA?


Juntouros de Miranda: turismo an çcurso direto: oubrigado Júlio Meirinhos, Melchior Moreira, Artur Nunes, D. José Cordeiro, D. Manuel Clemente.


La lhéngua mirandesa ye ansinada hoije an to las scuolas de l Agrupamiento de Scuolas de Miranda de l Douro, zde la pré-purmaira al 12º anho de l segundairo, anquanto ceplina nó curricular d’oupçon.

L sou ansino ampeçou ne l anho letibo de 1985/86, na scuola purparatória de Miranda de l Douro, inda antes de la lhéngua haber sido oufecializada. L sou purmeiro porsor fui Domingos Raposo. Apuis l’oufecializaçon de la lhéngua atrabeç la lei 7/99 de 29 de janeiro, publicórun-se las regras desse ansino ne l Çpacho Normatibo de l Menistro de l’Eiducaçon, nº 35/99, de 5 de júlio. Ne l anho 2000 l ansino stendiu-se a la scuola purmaira i ansino básico de Sendin, sendo porsor Carlos Ferreira. Hoije son porsores de mirandés: Domingo Raposo, Duarte Martins i Emílio Marins.

Tamien fúrun dados cursos ne l polo de Miranda de l Douro de la UTAD – Unibersidade de Trás-ls-Montes i Alto Douro, IPB – Instituto Politécnico de Bergáncia, Associaçon de Lhéngua Mirandesa an Lisboua, an cursos criados por Amadeu Ferreira i apuis cuntinados por Francisco Domingues i Bina Cangueiro, ne l Puorto pula scuola de Administraçon i Negócios, i na scuola segundaira de Puonte de Lima por Alfredo Cameiron.

L ansino de l mirandés ten benido a sufrir reduçon d’horas, i ten ua regulamentaçon cun grabes problemas que percísan ser resulbidos: la carreira de ls porsores, manuales pa ls bários níbles d’ansino, oubrigatoriadade de l ansino que debe passar a curricular. Aspera-se la retificaçon por parte de l Goberno de Pertual de la Carta Ouropeia de las Lhénguas Minoritairas, que asperamos que traia un nuobo statuto al ansino de l mirandés i resuolba de beç estes porblemas.

Assi i todo las ninas i ninos mirandeses stan de parabienes, porque ténen aderido an grande maiorie a este ansino, tenendo muita proua na sue lhéngua, i outelizando-la cada beç mais para comunicar nas redes sociales i na Anternet.

Sem comentários:

Enviar um comentário